हिमायतनगर : नांदेडच्या हिमायतनगर तालुक्यात सरासरी ७२ टक्के मतदानाची नोंद झाली. सकाळी पाऊस सुरू असूनही, शेतकरी आणि शेतमजुरी करणाऱ्या मतदारांनी मतदानासाठी मतदान केंद्रांवर रांगा लावल्या होत्या.
तालुक्यातील आंदेगाव, वडगाव, बोरगडी ताडा, हिमायतनगर, काडली बुद्रुक येथील केंद्रांवर ‘ईव्हीएम’मध्ये तांत्रिक बिघाड झाला होता; मात्र मशीन त्वरित बदलल्याने मतदान सुरळीत सुरू झाले. ४५० कर्मचाऱ्यांनी मतदान प्रक्रिया पार पडली. तालुक्यात ७९ हजार ८०० मतदार असून, ९० केंद्र होती. त्यापैकी दोन केंद्रे संवेदनशील होती, अशी माहिती सहायक निवडणूक अधिकारी एन. बी. जाधव यांनी दिली. तालुक्यात कुठेही अनुचित प्रकार घडू नये म्हणून राज्य राखीव दलाचे जवान आणि छत्तीसगड येथील पोलिस तैनात करण्यात आले होते, अशी माहिती पोलिस निरीक्षक भगवान कांबळे यांनी दिली.
शिवसेना-भाजप-‘रिपाइं’चे उमेदवार नागेश पाटील-आष्टीकर, काँग्रेस- राष्ट्रवादी काँग्रेस महाआघाडीचे उमेदवार माधवराव पाटील-जवळगावकर, अपक्ष उमेदवार बाबूराव कदम-कोहळीकर आणि वंचित बहुजन आघाडीचे डॉ. श्याम भारती यांचे भवितव्य ‘ईव्हीएम’मध्ये बंद झाले आहे. २४ तारखेला यांपैकी कोण विजयी होणार, याकडे सर्वांचे लक्ष लागले आहे.
